Pomi.uz

Украина, АҚШ ва Россия ўртасида ўтказилаётган янги дипломатик музокаралар фонида урушни тугатиш бўйича реал келишувга эришиш эҳтимоли пастлигича қолмоқда. CNN хабарига кўра, Швейцария ва БААдаги учрашувлардан сўнг ҳам томонлар ўртасида асосий позициялар бўйича фарқлар сақланиб қолмоқда.

АҚШ Президенти Доналд Трамп махсус элчисини Москвага юбориб, қайта ишлаб чиқилган тинчлик режасини Россия Президенти Владимир Путинга тақдим этишни топширган. Ўтган ҳафта ОАВга сизиб чиққан, 28 банддан иборат дастлабки режа Украина ва Европа давлатлари томонидан кескин танқид қилингач, ҳужжат 19 бандга қисқартирилган. Янгиланган матннинг аниқ бандлари очиқланмаган.

Музокараларга яқин манбалар уч йўналишда жиддий келишмовчилик борлигини билдирган: Украинанинг НАТОга қўшилиш масаласи, ҳудудий масалалар ҳамда Украина армияси сонини чеклаш таклифи. Украинага кўра, ушбу бандлар мамлакат суверенитети ва хавфсизлиги тамойилларига зид. Россия эса Донецк ва Луҳанск устидан тўлиқ назорат, Украинанинг НАТОдан бутунлай воз кечиши ва Қуролли Кучларига қатъий чекловлар киритилишини талаб қилмоқда.

АҚШ томонидан ишлаб чиқилган вариантда Украинага НАТОга ўхшаш, аммо формал аъзоликни назарда тутмайдиган хавфсизлик кафолатлари таклиф этилган. Бироқ бу механизмлар Россия ва Украина позициялари ўртасидаги тафовутни камайтиришга қанчалик хизмат қилиши номаълум.

Аналитиклар фикрича, Россиянинг фронт чизиғидаги босқичма-босқич силжиши ва Украинадаги ички сиёсий босим музокараларга қўшимча мураккаблик киритмоқда. Европа давлатлари эса чегараларнинг куч билан ўзгартирилишини тан олиш мумкин эмаслигини яна бир бор эслатган.

Трамп маъмурияти музокараларда “фақат бир неча банд бўйича фарқлар” қолганини билдирган бўлса-да, Украина расмийлари ҳали қабул қилинадиган вариант шаклланмаганини таъкидламоқда. Москванинг янги лойиҳага эҳтиёткор муносабат билдиргани ҳам келишувга эришиш истиқболини кучайтирмаган.