Pomi.uz

Украина Президент девони раҳбари Андрей Ермак унинг уйида антикоррупцион идоралар томонидан рейд ўтказилганидан бир неча соат ўтиб истеъфога чиқди. Ҳодиса АҚШнинг Россия билан урушни тугатиш бўйича янги дипломатик босими кучайган бир пайтда юз берди.

НАБУ ва САПО ўтказган тинтув сабабига оид расмий тафсилотлар ошкор қилинмаган, бироқ рейд икки ҳафта аввал энергетика инфратузилмаси билан боғлиқ йирик коррупцион схема бўйича тергов бошланганидан сўнг амалга оширилгани билдирилди. Мазкур тергов аввалроқ икки вазирнинг истеъфосига олиб келган.

Ермак Украина сиёсати ва ташқи дипломатиясида асосий фигура ҳисобланади. У сўнгги ҳафталарда АҚШ билан Женевада ўтказилган тинчлик музокараларида Украина делегациясига бошчилик қилган. Зеленский истеъфо эълонини тасдиқлаб, Президент девонини қайта шакллантириш жараёни бошланганини маълум қилди.

Украина расмийларига кўра, Ермакнинг ўрнини ким эгаллаши бўйича суҳбатлар яқин кунларда бошланади. Келаси раунд музокаралар чоғида делегацияга Бош штаб, Ташқи ишлар вазирлиги, Миллий хавфсизлик ва мудофаа кенгаши ҳамда разведка хизматлари вакиллари қўшилиши кутилмоқда.

АҚШ тақдим этган 28 бандлик тинчлик режасининг Украина ва Европа давлатлари томонидан кескин танқид қилиниши ортидан Трамп маъмурияти ҳужжатни қайта ишлашга мажбур бўлган эди. Украина позициясига кўра, ҳудуд бериш, армияни чеклаш ва НАТОдан воз кечиш каби таклифлар қабул қилиб бўлмайдиган шартлар сифатида қолмоқда.

Кремл Ермак истеъфосини диққат билан кузатаётганини билдирди. Россия расмийлари Украинадаги сиёсий беқарорлик музокара жараёнига таъсир кўрсатиши мумкинлигини таъкидламоқда.